السلام عليكم جاراتي لعزازات اليوم جبت ليكم
طبق مقبلات منظر جذاب و مذاق لذيذ لمهم
نبداو ب les canapés مالحين
نبداو من من جنب ليسر خديت خبيزات صغار ديال سندويش وقطعتهم
رقاق ودهنثهم بجبن فيلادلفيا نقدرو نديرو غير لكومير
العادي ودهنوه بأي فرماج
وخديت سمك سلمون درتو ف عويدات هو وزيتون كحل نقدرو
نديرو أي لحم مدخن ولا لانشون رقيق
عطوني هاد شكل
أما شكل لي حداه خديت هاد طرطيلات صغار مالحين صراحة
أنا غير شريتهم كينين موجودين لي كيعرف يصيبهم أحسن
وإلى ما لقيتوهمش يمكن تعوضوا ببسكوي مالح
خديت لصوص بشاميل وخلطها مع طون ودرتها ف جيب الحلواني
وزوقتها بكروفت مشحر ف شوية الملحة والابزار وتوما وزيت البلدية
أما شكل الثالث لي حداه فحتى هو هاد les volovantلي
عمرت غير شريتهم وصراحة رخاص بزاف
صراحة شاط ليا لخليط ديال البشاميل وطون زدت عليك طريف ديال
البربا حكيتها فالحكاكة رقيقة باش تعطيني لون
تقدرو تديرو أي خليط ولا أي ملون
درت لخليط حتى هو فجيب الحلواني وعمرتهم ودرت فوقهم
شوية تحميرة باش تجي مع لون
أما شكل لي حداه خديت كاشير قطعتو بقطاعة عندي ودرت فوقوا
فرماج مقطع وزيتون كحل جاو على هاد شكل
وشكل لي حداه خديت طريفات لي شاطو ليا ديال خبز سندويش
وقطعتهم على جوج ودهنثهم بكتشوب ودرت فوقهم سوريمي مقطع
أما شكل الأخير فخديت طرطيلات صغار عمرتهم بخليط ديال المايونيز
مع درة وسوريمي مقطع ودرت فوقهم بزروك معلب
وخديت واحد البلاتو عندي على شكل مرايا مخصص للمقبلات
وقديت فيه داك شي وجاو بحال هكا يمكن تخدموا بأي
مكونات وأي عمارة كيبقى ليكم لاختيار
بالصحة و الراحة
تبارك الله عليك افكار بسيطة وكتبان راقية تقولي تريتورة برافو
تبارك الله عليك
رائعين اللّٰه يعطيك الصحة
تبارك الله عليكم شهيويات وافكار فالمستوى الله احفضكم
Lb i3tik saha kaychhiw chokran
tbarkallah 3lik l fiikra dyalk zwina , dayra wa7ad la3rada ghadi ndir fiha hadchi simana jaya w nwrik kif ja