بسطيلة بالحوت من الجارة جارتكم عائشة

سلام البنات الحادكات، شهر رمضان المبارك قرب الله ادخلو علينا وعليكم بالصحة والسلامة، ويتقبل منا ومنكم ان شاء الله الرحمان الرحيم . طبق بسطيلة بالحوت طبق امكن لينا نوعو به الاطباق ديالنا فهاد الشهر الكريم

باسم الله نبداو

المقادير:

الكروفيت،الكلمار، البانكا، الشعرية الصينية،
الشومبنيون أسود،الواكامي،زيتون اخضر مقطع،
لب حامضة مصيرة ونص قشرتها مقطعة طريفات صغار،
عصير حامضة،صوص صوجا ،قزبور ومعدنوس مقطع،
بهارات السمك،والثوم بودرة،هريسة حسب الذوق،
ملح ابزار ،شويش كامون،كركم،صافي والورقة دالبسطيلة

طريقة بسطيلة بالحوت :

كنشحر كل نوع من الحوت بوحدو فشوي زيت وزبدة وملح وابزار،

منبعد فنفس المقلة ،كنشحر الفرمسيل بعدما رقدتها وقطعتها باش تنسم بالحوت

ونزيد عليها الشومبنيون مرقد ومقطع رقبق تاهو ونزيد عليهم الواكامي والزيتون وننكههم بالملح والبزار وشوي دالزبدة ونطفي عليهم،

ناخد مول واسع نوضع فيه الحوت ونعزل شوي للتزيين ،ونضيف الخلطة الل فالمقلة ،

ونزيد عليهم التوابل كلها والحامض والصوجا والثوم والربيع والهريسة ونخلط مزيان

ونذوق الى كان الملح او الحامض ناقص نضيفو،

صافي وها الحشوة واجدة،

الطريقة كنفرشو لوريقات دالبسطيلة كما العادة ونخدموهم بالزبدة ونوضعو الحشوة

ونوضعو فوقها شوي دالكلمار والكروفيت لكنا عزلنا،

ونغطوها وحنا كندهنو بالزبدة،صافي من بعد ندهنوها بصفار بيضة مخلط مع صوص صوجا وندخلوها للفران ،

وهاهي بسطيلة بالحوت بالصحة والراحة 

فالحقيقة جات لذيذة بزاف متشبعوش منها.

وديروها أجاراتي الحادكات العزازات وردو عليا الخبار

جارتكم عائشة