السلام عليكم جاراتي اش خباركم ؟؟ اليوم جبت ليكم كيك رولي
بطريقة جد سهلة وكيجي لذيذ بزاف وبمقادير
موجودة فكل بيت و في وقت قياسي
نبداو بسم الله
مقادير كيك رولي :
3 البيضات
كاس زيت
كاس سنيدة
خمارة
كاس طحين
للتزيين :
العسل
الفواكه الجافة
المربى
طريقة تحضير كيك رولي :
نبداو بسم الله
كنغسلو البيض باش نحلوه ونديروه فاناء
ونطربوه بالطراب اليدوي ونزيدو عليه السنيدة
ولي مكيبغيش الحلاوة بزاف يدير غير نصف كاس
ونبقاو بحال هاكا نطربو وحنا كنزيدو الزيت
ونطربو مزيان
ومن بعد الدقيق
و من بعد خمارة
ونبقاو نطربو حتى يولي عندنا خليط متجانس
ونجيبو طاوة لي غاديا تدخل للفران وخاصها تكون مربعة
ونفرشو فوقها ورقة لي كتفرش تحت الحلوة ونكوبو الخليط فيه
وندخلوه الفران 10 دقايق بالحساب والفران لي عندي
ديال الغاز كندير 5 دقايق الفوق و 5 دقايق التحت وكيكون
سخون من قبل كنخرجوها كتبان ليك راها تنفخات كتخرجيها
كتهبط من بعد متخافيش راها هيا هاديك
كاديري ورقة اخرى فوق الطاوة وتقلبيها و تحيدي الورقة
لي كانت تحت الكيك هنا مع اول مرة غنجربها درت واحد الخطا
ونبهكوم عليه باش مطيحوش فيه غير خرجتها من الفران وقلبتها
وانا نخليها فوق الورقة واحد المدة تاكملت واحد الشقية وملي جيت
نلويها لصقات ليا تجبديها ديري ليها الحشوة لي بغيتي وروليها ديك
الساعة متعطليهاش
دوبت شوية العسل ودهنتها بيه
ودرت الفواكه الجافة مهرمشة
وروليتها بالمساعدة ديال الورقة
وملي لقيتها وجدات فوقت قياسي وجدت وحدة اخرى
ولايني على المقادير زدت 2 خنيشات ديال الكاكاو فالعجين
وملي خرجتها دهنتها بالكونفتير وتقدري دهنيها بالشكلاط
او دانون كيفما كان وديري الفواكه بحال الفريز او التفاح او البنان
يكونو مقطعين رقاق مزيان كنروليها
ومن بعد كندخلوها الثلاجة وملي تبغي تقدميها خرجيها
وقطعيها و وقت التحضير ديالها مكيفوتش 30 دقيقة
وهاهيا كنتمنى تجربوها و تعجبكم
متنساوناش بالدعاء ديالكم بالصحة و الراحة
بسيطة وساهلة شكرا على الوصفة
تبارك الله عليك،زوينة.
كنعرفو عليك كتجيبي وصفات شهوة منهم ولكن هادي تعدات القياس سريعة وبسيطة ومقادير فالمتناول اللّٰه يعطيك الصحة
السلام عليكم جارتي واش ميمكنش نطيب كيك رولي بدون الورق ولويه أيضا شكرا
ghanjrbha bidni lah ntmna tsda9 lia
7ilo ketire
الله اعتيك الصحة غادي نجربها انشاء الله
بنين وسهل وممتاز حبتها عيلتي
هذا افضل موقع شكرا والله يجازيكم. بالنسبة للوصفات فهي شهية وطيبة وسهلة
بالصحة و الراحة
bghit na3raf wach lkas li3abrat bih dyal l3anba wa chokran kantmanalkom tawfi9 stafat bazaf mankom walah ijazikom
شكرا
العفو حبيبة
وصفة راؤعة جدا جدا