كيش بالكرعة الخضرة صحي

كيش بالكرعة الخضرة صحي و جد لذيذ من الأخت سوسو

السلام عليكم جاراتي اش خباركم ؟ فهاد الايام كيخصنا نوجدو ماهو صحي باش يفيدنا ويكون لذيذ باش ياكلوه كل افراد العائلة ومنساوش ايضا طريقة التقديم لي كتحببني لينا الاكل هادشي مجموع فوصفة اليوم لي هي كيش بالكرعة الخضرة ومنساوش طريقة التحضير لي جد سهلة يحضروهها المبتدئات و ايضا المحترفات في الطبخ

نبداو بسم الله

المقادير :

250 غرام عجينة مورقة
2 حبات كرعة
15 سنتليلتر قشدة طرية
2 معالق كبار زيت الزيتون
فطر
2 بيضات
نصف بصلة
100 غرام فرماج محكوك
ابزار ابيض ملح

طريقة التحضير :

كناخدو العجينة ديالنا كنطلقوها بالدلاك ونديروها فالمول ديال الكيش كبير اولا مولات صغار فرديين

وندخلوها الثلاجة لمدة 20 دقيقة ونوجدو حشوة كيش بالكرعة

فمقلة كنديرو البصلة مشلضة رقيقة تشحر فالزيت و نزيدو عليها الفطر والملح و الابزار

وملي يتشحرو مزيان كنزيدو عليها الكرعة خضرا محكوكة

ونبقاو نحركو لمدة 8 دقايق حتى طيب الكرعة

وفاناء كنطربو بالطراب اليدوي القشدة الطرية و البيض و الملح و الابزار

ثم كنزيدو الخليط ديال البصلة و الكرعة و الفطر ونحركو مزيان

ونجبدو العجينة ديالنا من الثلاجة ونكوبو فوفها الخليط وندخلوها الفران

وتبقا طيب حتى تحمار مزيان تقر تاخد حتى 35 دقيقة ديال الطياب

وتقدم ساخنة و هاهوا كيش بالكرعة الخضرا بالصحة و الراحة

متنساوناش من صالح دعاءكم