كيك رولي بالفراولة والكريم جد رائعة ولذيذة بالصور

السلام عليكم جاراتي العزازات جبت ليكم هاد المرة كيك رولي بالفراولة والكريم
من الوصفات الجد لذيذة وطريقة تحضيرها جد سهلة فقط تتبعي المراحل المصورة
وستنجح باذن الله بلا منطول عليكم
نبداو بسم الله

المقادير :

مقادير الجينواز :
5 بيضات
100 غرام سكر
60 غرام حليب
50 غرام زيت
90 غرام طحين
3 اكياس الفانيلا
مقادير الكريم :
400 مليلتر قشدة طرية
50 غرام حليب مركز محلى
20 غرام سكر سنيدة
2 حفنات فراولة
مقادير سيرو :
30 غرام ماء
30 غرام سكر سنيدة

طريقة تحضير كيك رولي بالفراولة والكريم  :

نبداو بتحضير الجينواز هي الاولى اول حاجة نعملوها هي نفرقو
ابيض البيض على الاصفر نديرو ابيض البيض فزلافة من الاحسن
نكونو درناها من قبل فالثلاجة تبرد باش بزربة يطلع لينا والبيض
حتى هو يكون فالثلاجة غير نخرجوه ونخدمو بيه ونطربو بالطراب
الكهربائي حتى يولي بحال الثلج

ونكونو درنا فيه قبصة ديال الملح وفزلافة اخرى نطربو
بالطراب الكهربائي اصفر البيض مع سكر سنيدة

حتى يولي خليط متجانس لونو قريب للابيض ومن بعد نزيدو
عليه الزيت والحليب وسكر الفانيلا وحنا كنطربو حتى يولي
خليط متجانس مزيان

ونزيدو الطحين يكون مغربل مزيان شحال من مرة

ونخلطو وليني هاد المرة غير بمعلقة كبيرة
وملي يولي جاهز

نزيد عليه ابيض البيض لو خليناه يولي بحال الثلج

ونمزجوهم مع بعضهم غير بمعلقة كبيرة ونبقاو نحركو فنفس
الاتجاه باش ميتهرسش لينا البيض وملي
يتخلط الخليط مزيان

نجيبو طاوة الحجم ديالها 30/39 سنتيمتر ونغطيوها بورق
سيلفيريزاي ويكون الورق مغطي الطاوة كاملة ونكوبو
فيها الخليط ديالنا

وندخلوها لفران يكون مسخن مزيان اولا الا كان عندك جارتي
ديال الضو سخنيه على درجة حرارة 200 ونخليوها فالفرن تقريبا
مابين 13 تال 20 دقيقة على حساب الفرن لي عندك وغير تبان
ليك بدات تذهب صافي خرجيها

  ونحيدو ليه ورق سيلفيريزاي

نكونو موجدين ليها منديل ديال الثوب نقي ومرشوش فوقو السكر صقيل باش
ملي تبدا تبرد متلصقش ونخليوها حتى تبرد وفهاد المدة ندوزو نوجدو
السيرو والكريما نبداو بطريقة تحضير السيرو سهل جدا مجرد نديرو الماء
وسكر سنيدة فكسرونة ونديروهم فوق عافية مهيلة غير دوب سنيدة
ونحيدوه من فوق العافية الا خليناه بزاف غيولي كراميل ودابا ندوزو
للكريما نديرو القشدة الطرية تكون باردة مزيان  فزلافة والسكر
سنيدة ونطربوهم مزيان لمدة دقيقة حتى تطلع القشدة نولي بحال
الثلج وعاد نزيدو الحليب المركز المحلى ونبقاو نطربو مزيان حتى
يولي القوام ديال الكريما جد متماسك

ونجيبو الجينواز ديالنا ونديروها فوق ورق سيلفيريزاي
ونحيدو بسكين جناب لي طايبين بزاف

ونجيبو فرشاة ونوزعو بيها السيرو لي وجدنا على الجينواز
كاملة منخليو حتى بلاصة ناشفة

ومن بعد نهزو شوية ديال الكريم

ندهن بيها الوجه ديال الجينواز

ومن بعد ناخدو دوك 2 حفنات ديال الفراولة نقطعوه طريفات
صغار ومن الاحسن يكونو متساوين فالقد ونزيدوهم
على الكريم لي باقي عندنا

ونحركو مزيان

ونحطو الكمية كاملة فالوسط ديال ديال الجينواز

ونلويو الجينواز ونخليو الكمية ديال الكريم لي فيها الفريز
كاملة الوسط ومن بعد نسدو عليها

بورق سيلفيريزاي ويلا خرج الكريم من جناب ماشي
مشكيل عادي ويلا كان ممكن نحاول ندخلوها بالمعلقة

وعاد نديروها فالبلاستيك الغذائي وتكون مغلفة عليها مزيان
باش نحافظو على الشكل ديالها ونديروها

فالمجمد ليلة كاملة ايلا بغيتيها تجيك رائعة واليوم الموالي رشي
فوقها سكر صقيل بغربال صغير باش يكون موزغ بطريقة جد متساوية
ونقطعوها وحبات فراولة من الفوق

وهاهيا كيك رولي بالفراولة والكريم

بالصحة والراحة كنتمنى تعجبكم وتجربوها
متنساوناش من صالح دعائكم ولاغلى الناس بالشفاء العاجل المصدر : uneirresistibleenviedesucre.com