صباح الخير عليكم جاراتي ان شاء الله تكونو بخير
ختاريت نقدم ليكم هاد المرة هلاليات معمرين بحشوة لي
بسيطة واقتصادية وليني فنفس الوقت كتجي لذيذة وكنتمنى
تنال رضاكم بلا مانطول عليكم نتوكلو على الله
المقادير :
للعجين :
500 غرام طحين
250 غرام دقيق القمح
ملح
بيضة
كيس خميرة الحلوة
100 غرام زبدة
للحشوة :
1 حبة بصل
1 حبة فلفلة حمرا
قطعة من لحم الديك الرومي
2 حبات جزر
ابزار
ملح
ضامة البنة
فرماج
طريقة تحضير هلاليات معمرين :
اول حاجة نوجدو العجين فقصرية كنديرو الطحين والقمح
والخميرة وكنعجونو العجينة ديالنا عادي فالاخير عاد كنزيدو
الملح والعجينة تكون شادة فراسها ماقاصحاش بزاف
ومرطباش بزاف ونخليوها ترتاح ومن بعد نشكلوها كويرات
وملي يرتاحو الكويرات تقريبا 5 دقائق كل كويرة كنكرصوها
مزيان بايدينا وندهنوها بالزبدة
ونطويوها على 4 وناخدو شوية الخميرة وندهنو
بيها الوجه ديال العجينة ونكرصوها شوية بايدينا حتى
يولي عندنا شكل مستطيل بحال جوا
ونبقاو بحال هاكا حتى نكملو الكمية كاملة ندوزو دابا لطريقة
تحضير الحشوة لي هي ساهلة بزاف الطريقة المعتادة
ولي مبتدئة تعلمها معانا ان شاء الله كناخدو حبة البصل
لي عندنا كنحكوها فالجهة الغليضة ديال الحكاكة
ونشحروها مع معلقة ديال الزبدة ونزيدو عليها ضامة البنة
والملح ومنقويوش الملح بزاف لان ضامة البنة حتى هي كتكون
مالحة والابزار ونحركو مزيان وعاد نزيدو فلفلة حمرا مقطعة
مربعات صغار و الجزر محكوك فحكاكة غليضة ونخليوهم يتشحرو
شويةمن بعد نزيدو عليهم لحم الديك الرومي مقطع لمكعبات
صغيرة ونبقاو نحركو
حتى طيب من بعد نحيدوها من فوق العافية ونخليوها
تاخد درجة حرارة المطبخ وناخدو معلقة كبير من الحشوة
ونديروها فجنب من العجينة ديالنا ونديرو فوقها الفرماج محكوك
من اي نوع بغيتي وننكم تكتفي بقطع من فرماج مثلثات
ونبداو كنلويو فالعجينة وحنا كنشكلو فيها على شكل هلالية
ونجيبو البيضة لي عندنا نطربوها وندهنو بيها
الهلاليات ونخليوها ترتاح لمدة 10 دقايق
وندخلوها لفران نكونو مسخنينو من قبل على درجة حرارة متوسطة تقدر تستغرق مدة الطهي ديالها 15 دقيقة ممكن اكثر على حسب الفرن لي عندك جارتي العزيزة
وهاهوما هلاليات معمرين بحشوة اقتصادية
بالصحة والراحة كنتمنى
تجربوه ويعجبكم في امان الله
المصدر : fatimato www
tbarkallah 3lik ajartna la3ziza
الله يبارك فيك اختي سومية
tbarklah 3lik Lah y3taik saha rzaaala
ياربي امين
tbarklah 3lik raw3a wkaychhiw
بالصحة و الراحة
Emmm Hadxi bniin lay3tik saha w ikhlik mstamra a hbiba
ياربي امين اختي فتيحة