غريبة البهلة سهلة ولذيذة بالصور

السلام عليكم جاراتي الغزالات كنتمنى تكونو فرحانات
وناشطات بغيت نشارك معاكم وصفة من الوصفات
التقليدية الشهية من عند الأخت كريمة جزاها الله عنا
كل خير لي هي غريبة البهلة لكتكون فموائدنا فجميع
المناسبات ولا منازع انها الرفيق الأول لاتاي فوجبة
اللمجة وطريقة التحضير جد سهلة ومقادير متوفرة
نتوكلو على الله ونبداو بسم الله

المقادير :

120 مليلتر زيت
125 غرام زبدة
120 غرام سكر سنيدة
120 غرام لوز محمر ومطحون
40 غرام زنجلان محمر ومطحون
معلقة صغيرة قرفة او كيس سكر الفانيلا
2 خمارات وزن 7 غرام
500 غرام طحين من النوع الممتاز

طريقة تحضير غريبة البهلة :

فقصرية كنديرو الزبدة والسكر تخدم مزيان حتى
تولي تقريبا اللون ديالها ابيض وعاد نزيدو الزيت
ونبقاو بحال هاكا كنضيفو كل من اللوز لي حمرناه
وطحناه بقشورو و الزنجلان لي حتى هو محمر
ومطحون وليني يتطحن غير شويةروالقرفة مطحونة
وفحالة مبغيتيهاش ممكن تضيفي فبلاصتها كيس
ديال سكر الفانيلا وفنفس الوقت نخلطو بيدنا

ومن بعد ملي يولي عندنا خليط متجانس نبداو
نزيدو الطحين بشوية بشوية

حتى يولي عندنا عجينة متماسكة ورطبة

ممكن نخدمو بكمية الطحين كاملة او ممكن جزء
كبير منها كيبقا على حسب نوعية الطحين وناخد
شوية العجينة فايدي

ونديرها على شكل كويرة الا تجمعات نحبسو
من الدقيق ونزيدو الخميرة لي غنخليوها حتى الأخير

ومن بعد نبدا نشكل كويرات صغارين فالحجم
ديالهم ونستفهم فطاوة تكون مدهونة بالزيت
ومرشوشة بالطحين ويكونو متباعدين

وندخلوها لفران سخون مزيان مسخنينو على
درجة حرارة 180 ويلا كان عندك فرن ديال الغاز
جارتي الغالية نسخنوه وليني ماشي بزاف
ونسبقو نيروها فالجهة السفلى باش تشقق
مزيان عاد نطلعوها للفوق تكمل طيابها ونخرجوها

ومن بعد نخليوها

حتى تاخد درجة حرارة المكان عاد نبداو نحيدوها
من الطاوة لانه كتكون هشيشة بزاف ملي كتكون
يالاه خارجة من الفران ونقدموها بالصحة والراحة

كنتمنى تجربوها وتقدموها لحبابكم بكل
فرح ودعيو معانا بالخير ولاعز الناس بالشفاء
العاجل ولصاحبة الوصفة

المصدر : صفحة الفايسبوك كدها بالفعل