بريوش بالسكر لذيذ جدا وسهل التحضير

السلام عليكم جاراتي الغزالات ان شاء الله تكونو
بخير وعلى خير بريوش بالسكر مقدم بطريقة جد
سهلة ومبسطة لتنجحي ان شاء الله في تحضيرها
نتوكلو على الله ونبداو بسم الله

المقادير :

500 غرام طحين
1 معلقة صغيرة ملح
70 غرام سكر سنيدة
1 معلقة كبيرة خميرة الخبز
2 حبات بيض
200 مليلتر حليب
60 غرام زبدة مارغرين
1 اصفر بيض
1 معلقة كبيرة حليب
للتزيين :
سكر سنيدة

طريقة تحضير بريوش بالسكر :

فقصرية نديرو الطحين والخميرة والسكر والبيض
والحليب يكون دافي ونعجنو البريشو ديالنا مزيان
وندلكوه لمدة 5 دقائق تقريبا وعاد نزيدو الزبدة لي
نكونو مقطعينها قطع صغيرة وملي تجانس الزبدة
فالعجينة ونحبسو العجين ونغطيوها ونخليوها تخمار
ناخدو العجينة من بعد ما تخمار

نرشو سطح بالدقيق مزيان ونجمعو فوقو العجينة
حتى تولي بالحجم الاول ديالها ونديرو الكويرات ديالنا
ونستفوهم فوق طاوة مدهونة بالزيت ومرشوشة
بالطحين وندهنوهم باصفر البيض ونضيفو ليه المعلقة
ديال الحليب باش يعطي لون ذهبي رائع للبريوش
وناخذو سكين ونديرو علامة x فوجه البريوش او بالمقص

ونرشو فوقها سكر سنيدة ونخليوها ترتاح ويضاعف الحجم ديالها
ومن بعد ندخلوها للفران حتى يولي لون ديالها ذهبي
ونقدمو بريوش بالسكر بالصحة والراحة

لحبابكم وناسكم ان شاء الله تعجبكم

ونالو نصيب من صالح دعائكم ولاغلى الناس
بالشفاء العاجل وللاخت سهيلة صاحبة الوصفة
جزاها الله عنا كل خير في امان الله
المصدر : sousou culiniare