من الاخت ” وردة مغربية ” أقدم لكم وصفة المعمول بعقدة اللوز المحمر ،
المعمول بعقدة اللوز وممكن تستعملي الكاوكاو عوض من اللوز مع اتباع خطوات التحضير نفسها و غتحصلي على نتيجة رائعة .
الوصفة بالصور والمراحل وأتمنى أن تنال اعجابكن
العجينة
125غ زبدة لينة
80غ بودرة اللوز
3 ملاعق كبار سكر سنيدة
1 ملعقة كبيرة عسل
1 صفار بيضة
الدقيق حسب الخليط + قبصة ملح
عقدة اللوز
150غ لوز مصلوق و مقشر و مقلي
2 ملاعق كبار سكر
نص ملعقة صغيرة قرفة
ملعقة كبيرة زبدة
ملعقة كبيرة ماء الزهر
نطحن اللوز مع السكر
نزيد الزبدة و الزهر و القرفة و نطحن حتى تجمع العقدة
هاهي العقدة كتجي معلكة و لديدة
من جهة أخرى نطرب الزبدة و السكر حتى تولي كريمة
نزيد أصفر البيض و العسل و نخلط
و نزيد بودرة اللوز
و نجمع بالدقيق بلا ما ننسى قبصة الملح
العجينة لازم تكون رطبة و مجموعة ما كتلصقش فاليدين و لكن ماشي قاصحة بزاف
نعمل كويرات صغار نعمرهم بعقدة اللوز بحال كيف مبين فالصورة
ندوز الكويرات فالسكر كلاصي
و نطبعهم بالمول ديال المعمول اللي متوفر كبير أو صغير حسب الرغبة
نستف الحلوة فوق لاطة مغلفة بالورق السولفيريزي
ناخد جزء من العجبنة نطلقها بالمدلك و نرشمها بطابع الوردة الصغير
ندهن بأبيض البيض باش تثبت مزيان
و نزين بيها المعمول بهاد الطريقة
ندخل اللاطة للفرن يكون سخون و نخليها حتى تتحمر
هدا شكلها ملي خرجتها من الفران
نغبرها بالسكر الكلاصي
و نزينها بالكونفتير ديال الفريز اللي زدت عليه الكلوكوز و طيبتو حتى عقاد و زدت معاه الملون أحمر
Ghzal tbarkalah 3lik akhti