اهلا وسهلا جاراتي الغزالات ان شاء الله
تكونو بخير على خير نقدم ليكم خبيزات
معمرين بالكبدة والجبن من عند الاخت
ليلى كاميل بطريقة جد سهلة لموائد
رمضان وايضا فوجبات اللمجة والعرايض
بالاضافة للمقادير البسيطة
نتوكلوا على الله ونبداو بسم الله
المقادير :
مقادير العجين :
2كؤوس فورص
2 كؤوس قمح
ملح
خمارة
ماء دافي للعجن
زيت الزيتون للذهن
مقادير الحشوة :
كبدة الدجاج
ضرس ثومة
ملح
قزبر ومعدنوس
حبة بصل
ابزار
زغفران اولا خرقوم
كمون
سكينجبير زيت الزيتون
هريسة
زيتون
جبن الساندويتش
طريقة تحضير خبيزات معمرين :
نبداو اولا بتحضير العجين نديرو الفورص
والقمح والخميرة
ونعجنوها بالما دافي والملح فالاخير
وندلكوها شوية حتى تولي لينا عجينة
رطبة ومتماسكة ونقسموها كويرات
متوسطين وندهنوهم بزيت الزيتون
ونغطيوهم بالبلاستيك الغذائي ونخليوهم
يرتاحو لمدة تقريبا نصف ساعة وندوزو
فهاد الفترة نوجدو الحشوة فمقلة
نديرو زيت الزيتون ونشحرو فيه البصلة
مشلضة والثومة محكوكة
وملي تدبال نزيدو عليها الكبدة
والتوابل الملح الربيع مقطع الابزار
الزعفران الكمون سكينجبير والهريسة
والزيتون
ونخليوها تبرد ونمشيو للعجينة نرشو
دقيق القمح فوق السطح لي غنخدمو
فوقو ونبسطو كل كويرة على حدة
ونديرو وسطها معلقة كبيرة ديال الحشوة
والفرماج
ونجمعو العجينة ونخليوها ترتاح شوية
بليما كلمنا الحشو ديال العجينة لي باقا
ونبداو باول كرصة حضرناها نبسطوها
ونديروها طيب ولي طيبناها نديروها فمنديل
باش يبقاو دافين ونقدموهم
بالصحة والراحة
في امان الله
ترك تعليق